نص رمضان عدى، والطقوس ثابتة.. ريحة الأكل مالية الشوارع، السفرة مليانة خير، والتلفزيون شغال بالعرض مش بالطول! بقينا حافظين الإعلانات، وعرفنا المسلسلات اللي كملت مع الناس واللي ماحدش جاب سيرتها.
الإعلانات: المنافسة مستمرة، والمفاجآت شغالة
الإعلانات بقت جزء من رمضان، فيه اللي علق في دماغ الناس، وفيه اللي عدى من غير بصمة:
• إعلان العربي: ثابت في الصدارة، فكرة حلوة وأغنية لايقة.
• حسين الجسمي: صوته جزء من رمضان، إحساسه بيكمل روح الشهر.
• بهاء سلطان في إعلان السويدي: صوت تقيل على فكرة قوية.
• حديد عز: الإعلان الأول بيركز على المصداقية، والتاني على الانتماء.. بس السؤال: مين كسب أكتر، حديد عز ولا الشركات اللي ظهرت معاه؟
• بنك مصر وزهرة المرشدي: محمود العسيلي سلم الراية لتامر عاشور، وزهرة راحت لأحمد سعد.
• إعلان دايس: بسيط، مباشر، والرسالة واضحة.
• إعلان بلبن: أكرم حسني لايق على الفكرة، بس هل هتشتري المنتج؟ مش شرط.
• إعلان بنك التعمير والإسكان: خفيف ومبهج، يرسم ضحكة سريعة.
• إعلان الضرائب: واضح وصريح.. “هاتدفع يعني هاتدفع”!
أما تكرار نفس الممثل في كذا إعلان، فخلانا نحس إن الموضوع مجرد سبوبة، بلا هوية أو انتماء لأي علامة تجارية.
الدراما: بعد 15 يوم.. مين كمل ومين وقع؟
دلوقتي بقى واضح مين اللي شد الناس ومين اللي اتحرق بدري:
• “العتاوله 2”: جزء جديد لكنه فقد روح الأول، كأنه مشاهد محشوة وخلاص، لكن شخصية “قطة” كانت إضافة قوية.
• “ولاد شمس”: فكرة جريئة عن الأطفال في دور الرعاية، ومينا أبو الذهب كان نجم العمل بلا منازع.
• “الشرنقة”: أحمد داود أثبت إنه ممثل متنوع، وقدر يغير شخصياته بذكاء.
• “كامل العدد”: البطلة حامل للمرة العاشرة! كأنه تحدي غير مباشر لسياسة تحديد النسل!
• “وتقابل حبيب”: كارتون ضعيف، وشفايف نيكول سابا عاملة توتر أكتر من أحداث المسلسل نفسه.
وأخيرًا.. رسالة مفتوحة لشركة “قوطنيل”
رجاءً.. كفاية، بجد محتاجين إعادة نظر في الإعلانات!
رمضان بيجري، ولسه المفاجآت مستمرة.. ولنا في الحوار بقية!
سارة أحمد إبراهيم
خبيره في الإعلام والعلاقات العامة
بكالوريوس تجارة انجليزي جامعة القاهرة
خبره اكثر من ٢٠عام في مجال الإعلام والتوعية والعلاقات العامة وتتراوح الخبره ما بين المجال الحكومي والقطاع الخاص
شاركت في كثير من الفاعليات المختلفة ما بين القطاع البيئي والاقتصادي والثقافي والفني
كاتبه هاويه في مجال العلاقات الاجتماعية وتناول القضايا بشكل ساخر
